TIHAS - Sastra Situmorang


HORAS - Dua di hami tubuni dainang. Ahu ma siangkangan boru panggoaran. Ibotonghu nahutodohon namargoar Sampe Tua Parmonangan. Disihaetekon nami so inama tabo na. Marlojongi dibatangi sahat tunabot ari. Digadu gadu ni hauma ido hami magodang, marbuntak buntak. Sian gadu gadu i ma hami manatap inong dohot Damang mangula, nungga sai songon horbo paninggala.

Somal na Inong do jumolo mulak sian juma. Dihunti ma inganan ni indahan, di ompa pudihan ibotoku, molo ahu mardalan do maniop niop serep. Omak ma di jolo sada ma tangan nai manogu-nogu ahu. Inong ma tahe sitantas dalan. Damang pukkul onom pe i mulak sian juma, jolo di tambok do bongbongan asa manjulur aek tu bogas nami. Asa malitap songot nai tabo mai ulaon.

Dijabu pintor dihodohon Inong do pardahanan, ahu disuru do manunsi piring inganan ni indahan nami sian balian. Ibotonghu ma pajaga jaga api manobahon asa unang rarat. Molo ndung gurgu pardahan i manigor di gora ito ma inong asa pintor di oroi. Margulut do hami manginup purik ni indahan i, jolo di bahen ma sira otik, molo itokku gula do dibahen. Ingkau rata na niduda ni inong nungga malamot disampur do dohot rimbang, hatandokan annon pe pangpanghonon na ndung satonga masak ingkau rata i.

Ndang pola loja inong paridi hami, boi do hami maridi sandiri. Di dok inong : ingkon boi do maridi sandiri. Jala di dok muse nungga balga hami.

Jolo mulak do Damang sian balian asa marsipanganon hami jala laos disima annon tutungon ni Inong gulamo. Asa mohom allangon unang muap tata. Kepala batu, balelang, kirsik-kirsik ido somal na lompan nami. Nian, olo do digoreng inong i naung suda do miak goreng nami hape masa onan dua ari nae.

Dosdo parpeak ni pinggan dohot simanjojak nami na mangan i. Damang do sibahen tangiang, inong ma jonok tu hudon. Ai inong do parsonduk bolon. Andorang so mangan hami jumolo do diparade inong gadong hau. Jala ingkon allangon do gadong hau on asa boi iba martambu mangan. Margulut do ahu dohot ibotongku manggallang gadong on. Sipata marbada ma hami alani paretongan. Ibotoku mandok dua ponggol dope hu allang gadong jala di dok ibana na niallang ni ibana nungga tolu ponggol. On ma parbadaan di hami na dua.

Laho modom ahu ingkon di lambung ni bapa do. Molo itokku di lambung ni inong. Hapit do hami nadua di tonga-tonga. Sada do gobar nami. Lobi ni tingkar manang amak ima di bahen hami bulusan.

Dinasahali marmeam ultop ma hami di jabu. Ultop on sian sambuhu bulu namenet, harotas ma diparaek hami nalaho peluruna, palatuk ni ultop i tong do sian sada bulu naung diarit mansai gonong. Ima di ultophon.

Apala tongon ma tusimalolong hu sabola siamun di ultophon ibotoku. Maranggung bobar ma ahu, sagogo ni gogona huhut hutiop simalolong hu. Disima muruk Damang. Inong pe patubekbek. Margistang ma bitis ni itokku di bahen Damang. Laos ima binggas mabarbar di ahu sada tigas nabolon ai songon na pedeng nama simalolonghu.

Ndung Singkola


Maila do ahu di singkola ai so goarhu be di gora angka dongan. "Pedeng" inama di Gorahon. Hape songoni uli goarhu di bahen Damang Romauli Hasiholan. Molo di bege itokku si Pedeng digorahon tu ahu. Tangis do ito i. Ai ndang tarjaloso molo i dibahen dongan manggora ahu.

Sahat tu namagodang, ndang apala piga baoa na jonok tu ahu ra ala na pedeng i ma simalolong hu sambariba. Ndang hu andungi be sitaonon hi. Ai songon dia pe hubahen mangalo angka jolma na manggorahon pedeng tu ahu ndang adong be labana. Holan ibotoki nama na sai mangalo, sipata diantung ma pakke batu ise na manghora ahu pedeng. Itokku ma nagabe parlinggoman di ahu.

Jolo marhasohotan do hami na dua asa lao Damang dohot Dainang mangadop Tuhan pardenggan basa i. Ahu tinggal ma di huta jala Anak ni namboru do mangalap ahu, paribanku sandiri. Itokku mangaranto do jala ganup bulan manogos tu ahu andorang so mangoli dope. Burju hian ma itoki tu ahu. Sude do diparade dia angka na husakkapi. Jala nungga huhilala taboni na mariboto.

Ndung pe mangoli itok,i unang majo taringot sitongoson holan paboa barita pe ndang adong be. Na somal ganup bulan adong do surat na, hape nungga mandok sataon ndang adong baritana. Nungga dao be kapal ni ibotoki. Nungga lupa tu ahu. Ndang di ingot be tihas na benahen na on. Ido mambahen mangandung ndang marilu ahu.

Ido mambahen ahu mangandung dinabuni.

Tudos ma on songon masa laluku.


Sastra Situmorang